Rætt um árangur umbóta í opinberri stjórnsýslu
Viðamiklar breytingar hafa orðið á íslenskri stjórnsýslu síðustu tvo áratugina en hafa þær skilað árangri? Þetta efni verður til umræðu á morgunverðarfundi um árangur umbóta í opinberri stjórnsýslu.
Fundurinn er haldinn á Grand hótel 10. febrúar næstkomandi. Þar verður m.a. rætt hvernig hafi gengið að innleiða umbætur á Íslandi, hvað megi læra af reynslu síðustu áratuga og hvernig íslenskir stjórnendur standi í samanburði við erlenda kollega þeirra. Ennfremur verður fjallað um áhrif umbóta síðustu tveggja áratuga á stjórnun og rekstur stofnana og hvort breytingar þurfi að gera á skipulagi opinbera geirans svo hann skili meiri árangri.
Á fundinum verður greint frá helstu niðurstöðum alþjóðlegrar rannsóknar (COCOPS)* og staða Íslands í samanburði við önnur Evrópuríki skoðuð. Könnunin, sem er umfangsmikil og var gerð í fyrra, greinir frá skoðunum og reynslu opinberra stjórnenda á Íslandi á umbótum í ríkisrekstrinum. Könnunin var lögð fyrir æðstu stjórnendur í tuttugu evrópskum löndum, þar á meðal hér á landi.
Fundurinn 10. febrúar er haldinn í samstarfi Félags forstöðumanna ríkisstofnana, fjármála- og efnahagsráðuneytisins og Stofnunar stjórnsýslufræða og stjórnmála við HÍ. Þátttökugjald er 4.900 krónur.
Dagskrá:
1. Pétur Berg Matthíasson, sérfræðingur í fjármála- og efnahagsráðuneytinu: Mat stjórnenda á Íslandi á umbótum innan stjórnsýslunnar
2. Gunnar Helgi Kristinsson prófessor í stjórnmálafræði við HÍ: Umbótaviðleitni og árangur stjórnsýsluumbóta í Evrópu
3. Viðbrögð við niðurstöðum rannsóknarinnar (í pallborði): Hvernig hefur gengið að innleiða umbætur í opinberum rekstri? Er þörf á breyttum áherslum í ljósi reynslunnar?
- Arnar Þór Másson, skrifstofustjóri í forsætisráðuneytinu .
- Magnús Guðmundsson, forstjóri Landmælinga Íslands.
- Sigríður Lillý Baldursdóttir, forstjóri Tryggingastofnunar ríkisins.
4. Sigurður Helgi Helgason, skrifstofustjóri skrifstofu stjórnunar og umbóta hjá fjármála- og efnahagsráðuneytinu: Helstu niðurstöður og næstu skref
Fundarstjóri verður Guðrún Ögmundsdóttir, sérfræðingur í fjármála- og efnahagsráðuneytinu.
*COCOPS (Coordinating for Cohesion in the Public Sector of the Future) rannsóknin er ein stærsta samanburðarrannsókn á umbótum í opinberri stjórnsýslu sem fram hefur farið í Evrópu. Íslenski hluti rannsóknarinnar var samstarfsverkefni fjármála- og efnahagsráðuneytis, stjórnmálafræðideildar Háskóla Íslands og samstarfsnets evrópskra háskóla. Markmið COCOPS rannsóknarinnar var að greina á heildstæðan hátt þær áskoranir sem opinberi geirinn í Evrópu stendur frammi fyrir og að skoða kerfisbundið áhrif umbóta sem kenndar eru við nýskipan í opinberum rekstri.