Nr. 2/2003. Rafræn skilríki fyrir ríkisstofnanir og viðskiptavini þeirra.
Fjármálaráðuneytið hefur fyrir hönd ríkisstofnana samið við Skýrr hf um kaup á rafrænum skilríkjum og viðeigandi tæknibúnaði fyrir notkun þeirra. Skýrr hf selur búnaðinn í umboði bandaríska fyrirtækisins Verisign, sem er stærsti seljandi slíks búnaðar í heiminum.
Í samvinnu ráðuneyta og nokkurra ríkisstofnana eru að hefjast allvíðtækar tilraunir með notkun rafrænna skilríkja og það skipulag sem viðhafa þarf við útgáfu þeirra og umsýslu. Aðeins eitt kerfi, veftollafgreiðslan sem hófst fyrir rúmu ári, hefur notað rafræn skilríki að einhverju marki, en tollyfirvöld hafa gefið út um 1000 rafræn skilríki vegna hennar. Byggt verður á þeirri reynslu sem þar er fengin en þjónustan víkkuð út til fleiri stofnana og aðferðir við útgáfu skilríkja og afhendingu endurbættar. Unnt verður að nota sömu skilríki til aðgangs að öllum þeim kerfum sem á annað borð geta nýtt þessa tækni. Ætlunin er að gera tilraun með gagnkvæma notkun skilríkja milli mismunandi seljenda og útgefenda. Þá er ráðgert að reyna bæði "mjúk" skilríki sem varðveitt eru á tölvu notandans og "hörð" skilríki vistuð á gjörvakortum eða svokölluðum USB-kubbum.
Eins og áður segir er um tilraun að ræða og á hún að standa í eitt ár. Takmarkaður fjöldi skilríkja verður gefinn út og afhentur viðskiptavinum þeirra stofnana sem þátt taka í tilrauninni. Reynslan sem fæst verður notuð til að undirbúa varanlegt kerfi.
Rafrænum skilríkjum má líkja við vegabréf eða önnur persónuskilríki. Þau eru gefin út til handa einstaklingi og eru ætluð til þess að tölvukerfi geti borið kennsl á hann með öruggum hætti þegar hann vill notfæra sér rafræna þjónustu hins opinbera, svo sem að fylla út tollskýrslu eða gera skil á virðisaukaskatti. Rafræn skilríki má einnig nota til að undirrita tölvupóst. Getur þá viðtakandi fullvissað sig um að pósturinn komi frá þeim sem undirritaði og einnig að efni skeytisins hafi ekki verið breytt á leiðinni. Ennfremur má nota rafræn skilríki til að dulrita upplýsingar og koma þannig í veg fyrir að viðkvæmar upplýsingar, t.d. um einstaklinga, komist í hendur óviðkomandi.
Íslenska ríkið stefnir að því að notkun rafrænna skilríkja verði almenn og útbreidd, enda er slíkt, ásamt viðeigandi lagagrundvelli og skipulagsráðstöfunum, ein af forsendum þess að rafræn viðskipti og stjórnsýsla öðlist það traust sem hefðbundnar aðferðir hafa áunnið sér gegnum aldirnar.
