Staða lífeyrissjóðanna
Úr Vefriti fjármálaráðuneytisins 27. september 2007 - þú getur gerst áskrifandi að vefritinu.
Á milli áranna 1997 og 2006 hafa hreinar eignir lífeyrissjóðanna vaxið úr 509,8 milljörðum króna í tæpa 1.500 milljarða, sem jafngildir 194% aukningu.
Þetta sýnir samantekt Fjármálaeftirlitsins á ársreikningum allra lífeyrissjóða. Ýmsar aðrar athyglisverðar kennitölur má lesa úr samantekt Fjármálaeftirlitsins eins og fram kemur í eftirfarandi töflu.
Lífeyrissjóðir
|
Flokkur
|
1997
|
2006
|
Breyting(%)
|
|---|---|---|---|
| Hrein eign, m.kr. - verðlag 2006 |
509.767
|
1.498.810
|
194,0
|
| Iðgjöld, m.kr. - verðlag 2006 |
36.733
|
95.121
|
158,9
|
| Lífeyrisgreiðslur, m.kr. - verðlag 2006 |
17.921
|
40.043
|
23,4
|
| Fjöldi lifeyrissjóða |
66
|
41
|
-37,9
|
| Fjöldi sjóðsfélaga1 |
139.086
|
200.893
|
44,4
|
| Örorkulífeyrir (% af lífeyrisgr.)1 |
18,4
|
20,9
|
|
| Lífeyrisbyrði (lífeyrisgr. sem % af iðgjöldum)1 |
47,3
|
48,2
|
|
| 1. Samtryggingardeildir. Heimild: FME. | |||
Iðgjöld hafa hækkað mjög mikið á umræddu tímabili eða úr 36,7 milljörðum í 95,1 milljarða sem jafngildir 159% aukningu umfram almennar verðlagsbreytingar. Þá hafa lífeyrisgreiðslur aukist úr 17,9 milljörðum króna í 40 milljarða sem er 23,4% raunaukning. Þessi aukning lífeyrisgreiðslna skýrist af því að lífeyrissjóðsréttindi lífeyrisþega eru stöðugt að batna. Margir eldri lífeyrisþegar hafa einnig fengið hækkaðar lífeyrisgreiðslur umfram verðlag vegna jákvæðrar raunávöxtunar lífeyrissjóðanna.
Fjöldi sjóðsfélaga hefur vaxið mikið en á það skal bent að margir eru með réttindi í fleiri en einum sjóði og eru því taldir oftar en einu sinni. Athygli vekur að hlutfall útgreiðslu lífeyris vegna örorku hefur vaxið úr 18,4% í 20,9%, en helsta skýringing á því er fjölgun örorkulífeyrisþega frá árinu 1997. Þá hefur lífeyrisbyrðin, lífeyrisgreiðslur sem hlutfall af iðgjöldum, hækkað lítillega.