Moody's hækkar lánshæfiseinkunn ríkissjóðs
Alþjóðlega matsfyrirtækið Moody's hefur hækkað lánshæfiseinkunn ríkissjóðs í Baa2 úr Baa3.
Moody‘s tilkynnti þetta í gær. Horfur verða áfram stöðugar.
Ákvörðunin byggist á þremur meginþáttum að því er fram kemur í tilkynningu Moody´s. Vísað er til vandlega undirbúinna aðgerða sem kynntar hafa verið vegna losunar fjármagnshafta, væntinga um bætta skuldastöðu ríkissjóðs á næstu þremur til fjórum árum og bættrar umgjarðar þjóðhags- og eindarvarúðarreglna sem miða að því að varðveita fjármálastöðugleika til framtíðar.
Moody's hefur einnig hækkað landseinkunnina fyrir erlendar skuldir til langs tíma og skamms tíma og innstæður í Baa2/P-2 úr Baa3/P-3 og landseinkunnina fyrir skuldir og innstæður í innlendri mynt í Baa1 úr Baa2.