Ríkisskattstjóri stofnun ársins
Embætti ríkisskattstjóra bar sigur úr býtum í vali á stofnun ársins 2015 en niðurstöður voru kynntar í gær. SFR- Stéttarfélag í almannaþjónustu stendur að könnuninni sem nú fór fram í tíunda sinn í samstarfi við Gallup og fjármála- og efnahagsráðuneytið.
Ríkisskattstjóri hefur áður verið tilnefndur sem stofnun ársins og varð í öðru sæti í könnun SFR í fyrra.
Í könnuninni eru valdar stofnanir og fyrirtæki ársins. Tæplega 50 þúsund starfsmenn á almennum og opinberum vinnumarkaði fengu könnunina senda og byggðist val á stofnun ársins á svörum tæplega 12.000 starfsmanna hjá ríki og sjálfseignarstofnunum.
Við val á stofnun ársins er stofnunum skipt í þrjá stærðarflokka – stórar stofnanir með 50 starfsmenn og fleiri, stofnanir með 20-49 starfsmenn og stofnanir með færri en 20 starfsmenn.
Ríkisskattsjóri var sigurvegari í flokki stórra stofnanana. Í könnuninni eru mældir þættir á borð við ánægju og stolt, starfsanda, trúverðugleika stjórnenda, launakjör, sjálfstæði í starfi, vinnuskilyrði, sveigjanleika vinnu og ímynd stofnunar.