Ríkissjóður gefur út skuldabréf í evrum
Ríkissjóður Íslands hefur í dag gengið frá samningum um útgáfu skuldabréfa að fjárhæð 750 milljónir evra, sem jafngildir um 116 milljörðum króna. Er þetta fyrsta opinbera útgáfa ríkissjóðs í Evrópu síðan 2006.
Skuldabréfin bera 2,5% fasta vexti og eru gefin út til 6 ára á ávöxtunarkröfunni 2,56%. Fjárfestar sýndu útgáfunni mikinn áhuga og nam eftirspurn um 2 milljörðum evra. Fjárfestahópurinn er vel dreifður og samanstendur aðallega af fagfjárfestum frá Evrópu og Bandaríkjunum.
Umsjón var í höndum Citibank, Barclays, Deutsche Bank og J.P. Morgan.
„Útgáfa skuldabréfanna markar tímamót og er afar jákvætt skref í endurreisn íslensks efnahagslífs. Ríkissjóður er að sýna fram á fulla burði til þess að fjármagna skuldir sínar á Evrópumarkaði, þeim markaði sem mestu skiptir fyrir fjármögnun ríkja. Kjör ríkissjóðs á erlendum mörkuðum hafa batnað verulega síðustu mánuði, sem gefur okkur færi á að lækka vaxtagjöld ríkissjóðs og því nýtum við tækifæri nú þegar aðstæður skapast fyrir hagstæða lántöku. Með útgáfunni er greitt fyrir bættum aðgangi fyrir innlenda aðila sem sækja í erlent lánsfé,“ segir Bjarni Benediktsson fjármála- og efnahagsráðherra.
Viðbrögð fjárfesta voru mjög góð og eftirspurn var nærri þreföld upphæð útgáfunnar. „Eftirspurn markaðsaðila eftir skuldabréfunum sýnir tiltrú þeirra á íslensku efnahagslífi og þeim árangri sem náðst hefur í ríkisfjármálum,“ segir Bjarni Benediktsson.
Andvirði útgáfunnar verður varið til þess að nýta heimild til forgreiðslu eftirstöðva tvíhliða lána til Íslands frá Norðurlöndunum, sem tekin voru í tengslum við efnahagsáætlun stjórnvalda og Alþjóðagjaldeyrissjóðsins 2008. „Það að við fáum nú á markaði u.þ.b. 1% lægri vexti en okkur stóðu til boða við fjármögnun efnahagsáætlunarinnar sýnir stóraukið traust á Íslandi,“ segir fjármála- og efnahagsráðherra.
Útgáfa skuldabréfanna er í samræmi við stefnu í lánamálum ríkisins þar sem markmiðin eru meðal annars þau að tryggja aðgengi að erlendum lánsfjármörkuðum til lengri tíma og að stórum og fjölbreyttum hópi fjárfesta.
Reykjavík, 8. júlí 2014