Konur um þriðjungur forstöðumanna hjá ríkinu

Konur eru 33% af fjölda forstöðumanna ríkisins, en hlutfallið var 31% á árinu 2011. Þetta kemur fram í kynjabókhaldi forstöðumanna 2012 sem birt er í nýju fréttabréfi stjórnenda ríkisstofnana.

Bókhaldið sýnir m.a. að hlutfall kvenna í stöðum forstöðumanna hefur aukist úr 25% í 33% á milli 2008 og 2012. Á sama tímabili hefur forstöðumönnum fækkað. Milli 2011 og 2012 fækkaði þeim um þrjá.

Fækkunina má rekja til sameiningar ráðuneyta í september 2012. Þá voru sjávarútvegs- og landbúnaðarráðuneyti, iðnaðarráðuneyti og efnahags- og viðskiptaráðuneyti sameinuð í eitt ráðuneyti, atvinnu- og nýsköpunarráðuneyti. Undir atvinnu- og nýsköpunarráðuneyti heyra nú 14 stofnanir en áður heyrðu 20 stofnanir undir þessi þrjú ráðuneyti. Ráðuneytisstjórum fækkaði um tvo og heilsugæslan á Dalvík tilheyrir nú Heilbrigðisstofnuninni a Siglufirði.

Einnig varð nokkur tilflutningur á stofnunum milli ráðuneyta. Undir fjármála- og efnahagsráðuneytið fluttust tvær stofnanir, Hagstofa Íslands og Seðlabanki Íslands sem áður heyrðu undir efnahags- og viðskiptaráðuneyti. Undir umhverfis- og auðlindaráðuneyti fluttust tvær stofnanir, Veiðimálastofnun sem áður heyrði undir sjávarútvegs- og landbúnaðarráðuneyti og Íslenskar orkurannsóknir sem áður heyrði undir iðnaðarráðuneyti.

Taflan sýnir fjölda forstöðumanna 2012 (þ.m.t. ráðuneytisstjóra) eftir ráðuneytum og hlutfall kvenna eftir hverju ráðuneyti fyrir sig.

Hér má sjá þróun á kynjaskiptingu forstöðumanna ríkisins síðustu fimm árin.