Hoppa yfir valmynd
13. janúar 2012 Fjármála- og efnahagsráðuneytið

Skýrsla Alþjóðagjaldeyrissjóðsins um gerð rammalöggjafar fyrir opinber fjármál

Fjármálaráðuneytið hefur um nokkurt skeið stefnt að endurskoðun laga um fjárreiður ríkisins sem sett voru árið 1997. Gildandi lög ná í meginatriðum yfir undirbúning og framkvæmd fjárlaga, reikningshald ríkisins og að nokkru leyti yfir  áætlanagerð og stefnumörkun, en talin hefur verið nauðsyn á að víkka gildissvið laga um fjárreiður ríkisins, m.a. þannig að þau taki til almennrar áætlanagerðar í opinberum fjármálum, fjárlagagerðar, framkvæmdar fjárlaga og fjárstjórnar- og eftirlitshlutverks Alþingis. Tryggja þarf að stjórnvöld á hverjum tíma leggi fram heildstæða ríkisfjármálastefnu til lengri tíma, sem taki mið af horfum og markmiðum í efnahagsmálum. Til þess að ná þessu markmiði þarf að endurskoða alla þætti gildandi laga um fjárreiður ríkisins. 

Undirbúningur  að endurskoðun fjárrreiðulaga hófst vorið 2011  þegar fjármálaráðherra sendi beiðni til Alþjóðagjaldeyrissjóðsins um að sjóðurinn  gerði tæknilega úttekt á stöðu mála hér á landi og setti fram hugmyndir um úrbætur. Sjóðurinn varð við þessari beiðni og hafa fulltrúar sjóðsins og starfslið fjármálaráðuneytisins unnið að gerð meðfylgjandi skýrslu á frá því í október síðastliðnum. Haldinn var fjöldi  funda með innlendum aðilum s.s. fjárlaganefnd, fulltrúum fagráðuneyta, fjármálastjórum sveitarfélaga, samráðsnefnd ríkis og sveitarfélaga um efnahagsmál og forstöðumönnum ríkisstofnanna. Aðstoð Alþjóðagjaldeyrissjóðsins gerir fjármálaráðuneytinu kleift að hafa aðgang að  sem flestum viðurkenndum sjónarmiðum sem æskileg eru þegar ný löggjöf um opinber fjármál er undirbúin.     

Skýrsla AGS
Í skýrslu AGS kemur m.a. fram að  endurskoða þurfi bæði gildissvið og form laga um fjárreiður ríkisins, að meiri áhersla sé lögð á undirbúning fjárlagagerðar, að  verkaskiptingu fjármálaráðuneytis og fagráðuneyta verði breytt, að samspil löggjafar- og framkvæmdarvalds við mótun fjárlaga verði endurskilgreint, að eftirlitshlutverk Alþingis verði aukið, að framsetning fjárlaga verði einfölduð,  að form reikningshalds taki mið af alþjóðlegum stöðlum og að aukin áhersla verði lögð á ítarlegri áætlanagerð og stefnumörkun til skemmri og lengri tíma. Allt fyrrgreint leiði til þess að ábyrgð og agi við meðferð opinberra fjármuna aukist til muna. Skýrsla AGS fylgir hjálögð.

Næstu skref
Fjármálaráðherra hefur skipað fulltrúa í stýrinefnd um endurskoðun fjárreiðulaga. Nefndin er leidd af fjármálaráðuneytinu, en í henni sitja fulltrúar þeirrra stofnana sem tilnefna fulltrúa í ríkisreikningsnefnd, þ.e. frá Hagstofu Íslands, Fjársýslu ríkisins, Ríkisendurskoðun og fjármálaráðuneyti, auk fulltrúa frá forsætisráðuneyti og Sambandi íslenskra sveitarfélaga, en fjárlaganefnd Alþingis tilnefnir áheyrnarfulltrúa í nefndina. Fulltrúar ráðuneyta og stofnana munu koma að afmörkuðum viðfangsefnum eftir því sem tilefni gefst til.  
Stýrinefnd er ætlað að  leggja fram tillögur til breytinga á gildandi fjárreiðulögum og hafa til hliðsjónar skýrslu AGS auk sjónarmiða annarra viðurkenndra aðila, innlendra sem erlendra.  

Fjármálaráðherra stefnir að því að frumvarp til laga um  opinber fjármál verði kynnt í ríkisstjórn og lagt fyrir Alþingi í  í maí 2012. Er miðað við að ný lög leysi af hólmi gildandi lög um fjárreiður ríkisins frá 1997, sem voru á sínum tíma mikið framfaraskref, en nýjum lögum er ekki síst ætlað að tryggja aukna ábyrgð og festu í fjármálum hins opinbera og að langtímasjónarmið séu lögð til grundvallar allri fjárlaga- og áætlanagerð.


Hafa samband

Ábending / fyrirspurn
Ruslvörn
Vinsamlegast svaraðu í tölustöfum