Efnahagslíf Norðurlandanna
Úr Vefriti fjármálaráðuneytisins 30. október 2008 - þú getur gerst áskrifandi að vefritinu.
Árin 2004-2007 var hagvöxtur á Norðurlöndununum umtalsvert meiri en á evrusvæðinu og í Bandaríkjunum, eða á bilinu 3,3 til 4,4% að meðaltali.
Hagvöxtur á Norðurlöndum var 3,6 % og 3,3% árin 2004 og 2005 og hvað mestur á Íslandi, eða 7,7% og 7,4%. Árið 2006 var hagvöxturinn á Norðurlöndum 4,4% að meðaltali og 3,5% árið 2007 en mestur í Noregi, 6,2% það ár. Áætlað er að hagvöxtur Norðurlandanna verði mun minni í ár, eða 2,0% og áfram mestur í Noregi, þótt hann dragist víða verulega saman á milli ára. Í flestum tilfellum má rekja minni hagvöxt til samdráttar í einkaneyslu og fjárfestingu. Árið 2009 er spáð að áfram hægi á hagvexti á svæðinu og að hann verði 1,3%.
Hagvöxtur á Norðurlöndunum
|
Hagvöxtur
|
2004
|
2005
|
2006
|
2007
|
Spá 2008
|
Spá 2009
|
|---|---|---|---|---|---|---|
| Danmörk |
2,3
|
2,5
|
3,9
|
1,7
|
1,1
|
0,5
|
| Finnland |
3,7
|
2,8
|
4,9
|
4,5
|
2,8
|
1,8
|
| Ísland |
7,7
|
7,4
|
4,4
|
4,9
|
1,7
|
-1,6
|
| Noregur (fastland) |
4,4
|
4,6
|
4,8
|
6,2
|
3,1
|
1,9
|
| Svíþjóð |
4,1
|
3,3
|
4,1
|
2,7
|
1,5
|
1,3
|
| Norðurlönd |
3,6
|
3,3
|
4,4
|
3,5
|
2,0
|
1,3
|
Hafa ber í huga að spár fjármálaráðuneyta Norðurlandanna voru allar gerðar í ágúst og september en aðstæður á erlendum fjármálamörkuðum versnuðu mjög mikið eftir að fjórði stærsti fjárfestingarbanki Bandaríkjanna, Lehman Brothers, varð gjaldþrota þann 15. september sl. Ljóst er að allar þessar spár eru í endurskoðun og á það sérstaklega við um Ísland, en viðbúið er að hagvöxtur hér á landi verði mun minni á næsta ári en kemur fram í meðfylgjandi töflu.
Í ofangreindum spám er gert ráð fyrir að einkaneysla taki við sér í Svíþjóð og Noregi á næsta ári en að fjárfesting haldi áfram að dragast saman. Víða er búist við samdrætti í íbúðafjárfestingu en einnig í fjárfestingu atvinnuvega. Nafnverð íbúða er tekið að lækka í flestum landanna.
Verðbólga hefur verið lítil á Norðurlöndunum undanfarin ár og mældist 1,8% að meðaltali árið 2007. Áætlað er að hún aukist í ár og verði 3,8%, en spáð að hún minnki aftur á næsta ári.
Atvinnuleysi hefur minnkað ört á Norðurlöndunum á undanförnum árum og er áætlað að sú þróun haldi áfram í ár, sérstaklega í Danmörku, þar sem gert er ráð fyrir 1,7% atvinnuleysi í ár. Þarlend stjórnvöld töldu fyrir nokkrum árum að svo lágt atvinnuleysisstig væri óhugsandi. Á næsta ári er gert ráð fyrir því að atvinnuleysi á svæðinu aukist lítillega á ný.