Stjórnendur í ríkisrekstri telja sig njóta mikils sjálfstæðis í starfi
Stjórnendur í ríkisrekstrinum á Íslandi njóta mikils sjálfstæðis í starfi s.s. við val, mótun og innleiðingu stefnu sem og almennt í starfsmannamálum, samanborið við stjórnendur í Evrópu. Þegar kemur að mikilvægi umbóta leggja stjórnendur mesta áherslu á gegnsæja og opna stjórnsýslu, rafræna stjórnsýslu, niðurskurð og að draga úr áhrifum skrifræðis á skilvirkni.
Þetta eru niðurstöður í alþjóðlegu COCOPS könnuninni á skoðunum og reynslu opinberra stjórnenda á Íslandi í tengslum við umbætur í ríkisrekstrinum. Könnunin er umfangsmikil og var gerð hér á landi í fyrra, en hún hefur verið lögð fyrir æðstu stjórnendur í 20 Evrópuríkjum. Farið var yfir niðurstöður könnunarinnar á fundi í Háskóla Íslands í morgun, en fjármála- og efnahagsráðuneytið, Félag forstöðumanna ríkisstofnana og Stofnun stjórnsýslufræða og stjórnmála við HÍ stóðu að fundinum.
Meðal annarra niðurstaðna könnunarinnar er að rétt um fjórðungur stjórnenda í ríkisrekstrinum telur að gæði opinberar stjórnsýslu hafi þróast í átt til betri vegar á síðustu fimm árum. Um helmingur telur að hlutirnir hafi staðið í stað meðan um fjórðungur telur að stjórnsýslan hafi versnað. Svipaðar niðurstöður má finna meðal stjórnenda í Evrópu. Yfir helmingur stjórnenda í ríkisrekstrinum telur að umbætur séu krísukenndar og ólíkar frá einu tilviki til annars og að þær snúist meira um niðurskurð og sparnað en að bæta þjónustu.
Á fundinum í morgun greindi Pétur Berg Matthíasson, sérfræðingur í fjármála- og efnahagsráðuneytinu, frá helstu niðurstöðum könnunarinnar og bar saman svör stjórnenda á Íslandi við svör evrópskra stjórnenda. Gunnar Helgi Kristinsson prófessor í stjórnmálafræði við HÍ fjallaði umbótaviðleitni og árangur stjórnsýsluumbóta í Evrópu út frá svörum stjórnenda.
Kynning Péturs Berg Matthíassonar
Kynning Gunnars Helga Kristinssonar
Á fundinum í morgun var einnig kynnt skýrslan Umbætur í opinberri stjórnsýslu á Íslandi: Viðhorfskönnun meðal stjórnenda í stofnunum og ráðuneytum. Skýrslan hefur að geyma mun ítarlegri umfjöllun um niðurstöður COCOPS rannsóknarinnar á Íslandi.
Umbætur í opinberri stjórnsýslu á Íslandi: Viðhorfskönnun meðal stjórnenda í stofnunum og ráðuneytum (PDF 611 KB)
Um COCOPS rannsóknina:
COCOPS (Coordinating for Cohesion in the Public Sector of the Future) rannsóknin er ein stærsta samanburðarrannsókn á umbótum í opinberri stjórnsýslu sem fram hefur farið í Evrópu. Íslenski hluti rannsóknarinnar var samstarfsverkefni fjármála- og efnahagsráðuneytis, stjórnmálafræðideildar Háskóla Íslands og samstarfsnets evrópskra háskóla. Markmið COCOPS rannsóknarinnar var að greina á heildstæðan hátt þær áskoranir sem opinberi geirinn í Evrópu stendur frammi fyrir og að skoða kerfisbundið áhrif umbóta sem kenndar eru við nýskipan í opinberum rekstri.
Frekari upplýsingar um COCOPS rannsóknina veitir Pétur Berg Matthíasson, [email protected]