Greiðsluafkoma ríkissjóðs janúar - júlí 2005. Greinagerð 1. september 2005

Greiðsluafkoma ríkissjóðs janúar-júlí 2005 (PDF 76K)

Greiðsluuppgjör ríkissjóðs fyrir fyrstu sjö mánuði ársins liggur nú fyrir. Samkvæmt uppgjörinu er breyting á handbæru fé frá rekstri jákvæð um 4,6 milljarða króna á tímabilinu, sem er 25,6 milljörðum króna betri útkoma heldur en áætlað var. Einnig er útkoman 20,6 milljörðum betri en á sama tíma í fyrra. Milli ára hækka tekjurnar um 34,7 milljarða, á meðan að gjöldin hækka um 15,1 milljarð. Hreinn lánsfjárjöfnuður er jákvæður um 15,8 milljarða króna miðað við 14,2 milljarða neikvæða stöðu í fyrra.

Heildartekjur ríkissjóðs námu 185,1 milljörðum króna og hækkuðu um tæpa 34,7 milljarða frá sama tíma í fyrra, eða um 23%. Þar af námu skatttekjur ríkissjóðs um 166,5 milljörðum króna sem er hækkun upp á 18,7% frá sama tíma í fyrra, nokkru meira en gert var ráð fyrir í áætlunum. Til samanburðar má nefna að almennt verðlag hækkaði um 3,8% á sama tímabili þannig að skatttekjur hækkuðu að raungildi um 14,4%.

Skattar á tekjur og hagnað námu ríflega 52,3 milljörðum króna á tímabilinu sem er 15,2% meiri innheimta miðað við sama tíma í fyrra. Þar af jókst innheimta tekjuskatta einstaklinga um 11,5% en tekjuskattur lögaðila drógst saman um 5,6%. Umtalsverð aukning varð hins vegar á tekjum af fjármagnstekjuskatti, eða um 54% sem jafngildir um 48,3% raunhækkun milli ára. Innheimta tryggingagjalda nam rúmlega 18,1 milljörðum króna sem er 11,9% aukning að raungildi frá fyrra ári en til samanburðar má nefna að launavísitala Hagstofunnar hækkaði á sama tímabili um 6,6%. Innheimta eignarskatta jókst töluvert á milli ára, eða um 44% að raungildi en sú aukning endurspeglar að mestu aukna innheimtu stimpilgjalda enda hefur velta á fasteignamarkaði verið umtalsverð á árinu. Aðrar rekstrartekjur námu 18,1 milljörðum króna og jukust um 8,1 milljarða milli ára sem skýrist einkum af arðgreiðslum frá Landssímanum og sektargreiðslum olíufélaganna.

Veltuskattar ríkissjóðs jukust einnig töluvert frá sama tíma fyrir ári, eða um 19,1% sem er 14,7% aukning að raungildi. Þróun almennra veltuskatta gefur nokkuð góða mynd af þróun eftirspurnar í hagkerfinu og þá sérstaklega þróun virðisaukaskattsins en hann hefur aukist um 22,5% frá fyrra ári sem gefur vísbendingu um að lítið lát virðist vera á almennri eftirspurn. Jafnframt skiluðu vörugjöld af ökutækjum mun meiri tekjum inn en í fyrra, eða um 76,5% en á fyrstu sjö mánuðum ársins hefur innflutningur bifreiða aukist um 61,5% frá fyrra ári.

Greidd gjöld námu 181 milljarði króna og hækka um 15,1 milljarð frá fyrra ári, en þar af skýrast 5,7 milljarðar af hækkun vaxtagreiðslna þar sem stór flokkur spariskírteina kom til innlausnar í apríl. Að vöxtum frátöldum hækka gjöldin um 6,1% milli ára. Útgjöld til félagsmála, þ.e. vegna almannatrygginga, fræðslu- og heilbrigðismála, vega langþyngst í útgjöldum ríkissjóðs, eða 116,6 milljarðar sem er 64%. Þar kemur fram 8,4 milljarða króna hækkun, eða 7,8%. Innan málaflokksins munar mest um hækkun til heilbrigðismála, 4,8 milljarða og 3,1 milljarða vegna fræðslumála. Hins vegar eru greiðslur til almannatrygginga því sem næst óbreyttar frá því í fyrra. Greiðslur annarra málaflokka, en félagsmála og vaxta, standa einnig því sem næst í stað milli ára, t.d lækka greiðslur til atvinnumála um 1,1% en hækkun almennra mála nemur 1,8%.

Lánahreyfingar. Afborganir lána námu 33,3 milljörðum sem skiptast þannig að 19,3 milljarðar eru vegna afborgana erlendra langtímalána og 13,9 milljarðar vegna spariskírteina. Lántökur námu samtals 13,3 milljörðum króna, 9 milljarðar innanlands í formi ríkisvíxla og ríkisbréfa og 4,3 milljarðar í erlendum skammtímalánum. Þá voru 2,3 milljarðar greiddir til Lífeyrissjóðs starfsmanna ríkisins í því skyni að lækka framtíðarskuldbindingar sjóðsins. Handbært fé ríkissjóðs lækkaði um 6,5 milljarða frá áramótum fram til júlíloka.

Sjóðstreymi ríkissjóðs janúar - júlí 2005

(Í milljónum króna)

Tekjur ríkissjóðs janúar-júlí

(Í milljónum króna)

Gjöld ríkissjóðs janúar-júlí