Hoppa yfir valmynd
16. nóvember 2021 Fjármála- og efnahagsráðuneytið

Ísland hækkar um fjögur sæti milli ára

Ísland er í sjöunda sæti meðal Evrópuþjóða þegar kemur að stafrænni opinberri þjónustu samkvæmt árlegri könnun Evrópusambandsins (eGovernment Benchmark). Könnunin nær til 36 landa, en Ísland hækkar um fjögur sæti milli ára og nálgast hratt markmiðið um að vera meðal fremstu þjóða í stafrænni opinberri þjónustu með þarfir notenda að leiðarljósi.  

Niðurstaðan sýnir að Ísland er vel yfir meðaltali í þremur af fjórum flokkum könnunarinnar. Hún leiðir einnig í ljós hvað þarf að hafa í huga til að bæta stafræna þjónustu enn frekar og er vinna við þau atriði þegar hafin. Markmiðið er að Ísland styrki stöðu sína enn frekar á þessu sviði á næstu árum

Einkunnagjöf í könnuninni (eGovernmet Benchmark) byggir á fjórum meginflokkum:

  1. Notendamiðuð þjónusta. Lagt er mat á það  hvort þjónustan sé stafræn, farsímavæn og hversu góður stuðningur er þar við. Ísland er í 5. sæti með 96 prósentustig, vel yfir meðaltalinu sem er 88 prósent.
  2. Gagnsæi. Metið er hvort stafrænu þjónustuferlin séu gegnsæ og hvort notandi sé þátttakandi í ferlinu og hafi góða yfirsýn. Ísland er í 3.sæti með 85 prósentustig, aftur vel yfir meðaltalinu sem er 64 prósent.
  3. Kjarnaþjónustur. Lagt er mat á hvort grunnkerfi og grunnþjónustur hins opinbera séu aðgengilegar. Dæmi um slíka þjónustu er stafræna pósthólfið á Ísland.is. Ísland er í 6.sæti með 89 prósentustig, vel yfir meðaltalinu sem er 61 prósent.
  4. Þjónusta þvert á landamæri. Hér er lagt mat á hvernig stafræn þjónusta gagnast notendum í öðrum löndum. Meðal annars hvort hægt er að nálgast upplýsingar um þjónustur á öðru tungumáli en íslensku og hvort unnt er að nota rafræna auðkenningu þvert á landamæri sem er eitt af lykilatriðum meðal þjóða innan Evrópusambandsins. Það er mikill hagur fyrir Íslendinga að vera leiðandi á þessu sviði þrátt fyrir að standa utan Evrópusambandsins. Ísland er í 14.sæti í þessum flokki með 54,8 prósentustig en meðaltalið er 65 prósent.

Ísland.is talin ein besta opinbera þjónustugáttin

Í niðurstöðum könnunarinnar er Ísland.is nefnd sem ein af 8 bestu þjónustugáttum opinberra aðila. Þá situr Ísland í öðru sæti í notkun  rafrænna skilríkja, fast á eftir Eistlandi sem er leiðandi á því sviði.  

Könnunin er ítarleg og byggir á notendasögum sem snúa að bættri notendaupplifun og opinberri þjónustu, markmið sem eru í takt við stafræna stefnu hins opinbera.

Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum